Leka Main Wa Indung (Nembiak Taun 3)

Wa Indung

Leka main Wa indung tu enti dulu kelia dikena bala sida ke tuai merindang anak mit. Lebuh sida begempuru ba ruai maya lemai hari tauka silau hari. Leka main tu deka disadaka ngagai bala nembiak. Kebuah pia, dulu kelia nadai televisyen tauka telefon dikena sida.

Nyadi tu video ti disadaka siku nembiak ti diajar aku ba sekula SK RH Tayai, Tatau. Leka main ti disadaka iya nya leka main Wa indung. Leka main tu bisi dalam bup teks Taun 3.
Nembiak tu enda tentu nemu macha tang iya bisi pengeransing nyadaka leka main.

Jaku peransang aku siti aja "Enti ukai kitai, nadai orang bukai deka ngangkatka bansa Iban"

 

Ditulis,

Pengajar Aless 💓

Chara-chara ngajar nembiak primari macha ngena kereban tu

Kita sama bela nemu macha tu chukup penting dalam ngasilka nembiak ti nyulut dalam pelajar.  Kati nemu ke enda kita reti macha tu? Macha tu mih chara kitai bekomunikasyen.  Taja pia, proses macha tu siti ari proses ti tusah laban kitai mesti nujah proses belemati,ninga, ngingat,bebidaka munyi ti engkeman,nyebut tukuh urup enggau betul lalu begulaika munyi ngambika nyadi leka jaku ti bisi reti. Mayuh amat pemanah ti bisi diulih kitai enti sema kitai pandai macha. Nyadi ba baruh tu aku deka bejuraika chara-chara ngajar nembiak primri ngena kereban tu.

Keterubah iya chara dikena ngajar nembiak macha ngena perengka tu iya nya meri chelak chura ti bebida. Ambika chunto, urup jambu nya tau digaga dalam chura ti enda sama baka jam diberi chura mirah lalu bu diberi chura biru. Tu tau bendar meri  nembiak ti deka macha nya enda saru lalu iya nemu bakani chara ti deka nyebut leka jaku nya.  Kitai sama bela nemu nembiak sekua primary empai tentu nyulut bendar dalam pelajar sida.  Ukai semina nya aja enti kitai meri chura iya ti bebida tu tau bendar narit ati bala nembiak ngambika lebih rinduka pengawa macha.  Kitai mega deka meri gambar ti  seriran enggau leka jaku ke bisi laban enggau chara tu sida ulih ngingatka leka jaku nya sereta enggau gambar nya sekali.  Maya umur tu bala nembiak selalu iya rinduka utai ti mayuh chura laban nya tau ngasuh sida lebih rindu agi macha.

Kelimpah ari nya, kitai nerangka enggau silik tukuh urup ti bisi dalam kereban nya.  Chara tu tau bendar ngasuh sida mereti agi ke utai ti dibacha sida.  Nembiak sekula primari lebih mereti enti kitai nerangka tukuh urup ke bisi dikena dalam teks nya.  Pengawa tu tau bendar ngasuh sida rindu deka nemu mayuh agi sepil ti kebukai.  Nya alai,  aku nyediaka teks ti besai ngambika sida ulih meda nya enggau silik.  Kati ku enda pia, laban nembiak sekula primary tu sigi nitih aja utai ti bisi disediaka bala pengajar.  Tu mih kebuah aku meri teks ti senang ngambika nyamai dibacha sida sebedau sida nyepil urup kebukai.

Nangkankanya, chara ti bisi dikena lebuh maya ngajar macha tu ngena kereban ti di atas iya nya aku macha dulu udahnya baru sida nitihka leka jaku ti disepil aku.  Chara tu manah bendar laban tau ngasuh sida ingat enggau lebih lama sereta uli mantu sida lebih mereti ke teks.  Kebuah pia, laban bisi nembiak nemu tukuh urup tang mih enda nemu nyebut iya sechara betul. Bisi sekeda sida nyepil urup nya ari belakang tang enda ari depan.  Nya alai, chara tu tau ngasuh bala nembiak sekula primari enda nangi ke diri lebuh maya diasuh macha dalam kelas. Bala nembiak mega ulih nitih belubah-lubah lebuh maya aku nyebut leka jaku nya. Lebuh maya tu sida bisi peluang ngemetulka patah sebut ti disebut sida kelebih agi patah sebut tetutp enggau tebuka.

Chara kebukai ti dikena aku ngajar macha ngena kereban tu iya nya ku ngasuh bala nembiak macha leka jaku nya siku-siku nyentukka sida iya nemu. Aktiviti tu tau bendar meransang sida ngingat sereta ngasuh sida majak berani deka nguji nyepil leka jaku ti kebukai.lebuh maya sida macha tu, aku ulih ngemetulka patah sebut sida sereta ngajar chara nyebut patah sebut ti betul. Nyadi sida nyau majak nemu nyepil tauka nyebut leka jaku bukai enggau jampat. Dalam aktiviti tu mega, aku ulih nemu nangka ni pengelandik sida macha lalu bagi sida ti udah landik aku deka meri sida aktiviti ti kebukai baka nyepil leka jaku ti panjai mimit.  Ba bagi nembiak ti empai tentu nemu nyepil aku deka nyediaka teks ti senang sereta pandak awakka sida tau mupuk belajar nyepil ngena kereban nya.

Chara-chara ngajar nembiak primari nulis ngena kereban tu

Kitai patut nemu sereta beratika nama agi penanggul ti bisi ngachau bala nembiak primari. Kebuah pia, laban nembiak primari  patut ngembuan pengelandik nulis. Sebedau kitai ngajar sida iya nulis enggau nyemetak agi kitai patut ngajar nembiak berengkah narak pengelandik pra-tulis. Nya alai tu tau bendar meri peneleba sereta ulih  ngelatih kordinasyen jari enggau mata nembiak. Udah nya sida dilatih tulis chelak enggau tulis tampung. Ukai semina nya aja laban kitai patut nyediaka aktiviti  ti sesiran enggau pengawa nulis. Pengawa tu diperambu dikena meri peluang nembiak nulis nitihka tuju ti ditetapka dalam langgur pelajar. Ba baruh tu legi, aku deka bejuraika chara-chara ngajar nembiak primari nulis.

Chara ti keterubah ngajar nembiak nulis ngena kereban tu iya nya aku deka nyediaka siti aktiviti nulis.  Ambika chunto, aku ngasuh sida nembiak nundaka sepil ke bisi dalam teks ti disediaka. Nyadi pekara tu tau bendar ngasuh sida meretika teks ti bisi.  Aktiviti tu mai asil ti manah laban sida ukai semina nulis tang mih bisi proses sida ngingatka tukuh urup ti bisi dalam teks nya. Bala nembiak mega ulih midaka tukuh urup ke bisi dikena dalam teks lalu nemu nulis tukuh urup enggau manah.

Kelimpah ari nya, chara dikena aku ngajar ngena kereban tu iya nya bejalaika siti agi aktiviti iya nya nulis tukuh urup ba atas selambar keretas kosong tang sida enda tau meda sepil ke bisi ba teks nya.  Nyadi tu tau bendar ngasuh sida majak landik sereta lebih mereti agi siti-siti tukuh urup bisi dikena. Nya alai, maya tu aku ulih nemu bagi sida ti empai meretika tukuh urup ti ditulis iya.  Maya tu mih aku ulih meri tulung ngagai iya sereta ngajar iya nulis tukuh urup ti ngena. Aktiviti tu mega ulih meri  peluang ngagai sida betanyaka pasal utai ti enda ditemu sida kelebih agi lebuh maya deka nulis sepil ti panjai.

Nambahka nya mega, aku deka nyediaka pensel chura ti enda sama warna dikena sida nulis tukuh urup.  Kitai sama bela nemu dalam pemayuh nembiak sida lebih mereti agi lebuh maya sida begunaka chura ti lain.  Ambika chunto, maya sida nulis urup jambu aku deka ngasuh sida ngena chura ti enda sebaka baka jam ngena chura mirah lalu bu ngena chura gadung. Pekara tu tau bendar mantu sida tau nulis sepil ti betul. Nyadi lebuh maya meda chura ti bebida tu sida bisi pengingin ati deka nemu sepil ti kebukai. Ngena chura ru sida ulih belajar enggau dalam agi sepil ti bisi laban sida rindu nulis tukuh urup ngena chura ti bebida.

Ukai semina nya aja, aku deka nyediaka siti bup garis tiga dikena sida nulis. Lebuh ti udah meda teks nya, aku deka ngasuh sida nulis siti sepil enggau suah ba atas lambar keretas nya. Aku deka ngasuh sida nulis sepil nya beulang-ulang. Chara tu tau bendar meransang untak sida berunding. Mayuh amat pemanah pengawa tu laban bala nembiak nyau majak mereti sereta ulih ngemanahka tulis sida. Nya alai, bala nembiak bisi ngembuan peneleba jari megai pensel lalu jari sida enda kering lebuh maya nulis.  Ukai nya aja, aktiviti tu mega tau ngelatih bala nembiak sekula primari nulis enggau jampat agi enda baka selama. Sida mega nyau bisi pengerindu dalam pengawa nulis lalu tu tau bendar mai penguntung ngagai sida.

Nangkanka nya, aku mega bisi chara ti kebukai ti dikena ngajar nulis ngena kereban tu  iya nya ngelalaika teks ti diayan tadi ba endur bukai. Sepengudahnya, aku deka nyebut sepil bukai ti bisi dalam kereban dikena ngajar nya lalu sida nulis nya baru. Nya alai, maya pengawa tu dipejalaika aku deka meratika nembiak ti empai nangkap tauka meretika utai ti disebut aku tadi.  Nya alai, aku ulih nemu sapa bagi sida nembiak ti empai nemu enggau silik pasal utai ti dipelajarka sida. nya mih kebuah nembiak ti bakatu sigi diajar aku enggau silik agi sampai iya nemu baka bala kaban ti kebukai.

 Chara ti dikena ngajar nulis ngena kereban tu mega iya nya aku deka nyediaka garis putus-putus ngagai bala nembiak.  Kitai sama bela nemu bala nembiak primari sigi rindu begagaka latih ti bakatu. Ari nya, sida majak deka nulis ketegal mayuh macham aktiviti ti bisi dipejalaika.  Nyadi ba latih nya tadi, sida ulih nitihka garis putus-putus nya lebuh maya nulis tukuh urup. Tu tau bendar meri pemanah laban sida ulih ngelatih diri nulis enggau kemas. Aku deka nyediak bup ti bakatu ti bepelasarka sepil ti patut ditunda kita.  Sida nyamai nulis tukuh urup ngena bup garis putus-putus tu laban bisi dipadahka chara nulis tukuh urup nya ngena tanda ti udah disediaka.

Kereban tu mega ulih dikena ngajar nembiak nyura gambar ti bisi dalam teks nya.  Sida ulih ngelukis gambar ke bisi disediaka dalam keretas ti kosong.  Kereja latih tu tau bendar meri peneleba ngagai jari sida mega pensel sereta ulih nyura ngena chura ti bebida. Sida iya ulih belajar megai pensel enggau ngena. Tikas tu manah bendar dikereja bala nembiak priari laban ulih ngasuh sida tan megai pensel lebuh maya ti nulis dalam awak ti lama.  Jari sida mega nyau enda berasai pedis laban asai pegai pensel sida udah seriran enggau pemesai jari sida iya.

Kepenudi endar, chara ti dikena ngajar nulis ngena kereban tu iya nya aku deka megai jari sida lebuh maya sida nulis.  Chara tu tau bendar dikena laban sida ulih nemu chara ti ngena lebuh maya nulis.  Maya tu mega sida tentu nitihka tungga jari kitai ti ngajar sida nulis. Nembiak sekula primari selalu iya empai tentu pandai nulis enggau betul laban bisi sekeda sida empai nemu nulis enggau beresi.

Pengelandik Jaku Iban

PANSIK SERETA PEJURAIKA PENGELANDIK JAKU IBAN

Sida ngumbai Jaku iban tu bisi ngembuan sifat homogen laban tu mai reti siti bansa aja.   Ba penemu, C.A Bamfylde (1898),  bansa Iban iya nya bansa peribumi ti homogen reti iya siti bansa aja laban bisi mega bansa-bansa kebukai , ngena jaku ti sama sereta ngemeranka gaya idup, pengarap, nilai, adat asal Iban enggau kebudayaan Iban ti sebaka. Ukai semina nya aja, jaku Iban tu mega dikumbai sida bisi sifat homogen ketegal  bansa Iban kaya enggau pemanah jaku dalam komunikasyen sereta jaku penemu.  Jaku Iban keterubah iya ngerembai laban ti suah dikena alam kaul besehari-hari antara kitai bansa Iban.  Jaku Iban  mega ukai semina dikena kitai dalam komunikasyen enggau pangan diri aja  tang mega diguna maya deka ngenataika buah runding sereta utai ke bisi dalam pikir sida.  Kitai bansa Iban mega lebuh maya berandau enggau pangan diri sigi ngena jaku Iban sida iya empu.  Kitai patut temegah ati laban tu udah nyata ngayankan jaku Iban udah mansang sereta majak ngerembai.

 Nyadi penyampau bansa  ti majak nambah udah ngasuh jaku Iban tu majak penting sereta seriran enggau pegingin ati ti deka  begunaka jaku Iban enti nitihka penemu Chemaline Osup (2011).  E.H Gomes (1911), nerangka buah runding  tu enggau silik agi nitihka utai ti udah diperatika lebuh maya iya diau ba menua Sarawak.  Gaya idup bansa Iban tu majak betambah manah agi enti nitihka utai dicatat iya, tauka  ari segi runding, bekebun, chara nyaga pengerai lalu  sida mega ngemeranka pengawa belajar.  Lebuh maya pulai ke menua diri sida ulih nyadika chunto  ngagai bala pangan ti kebukai laban bala nembiak Iban udah mujur ngambiska sekula.  Jaku Iban ulih  nyadi jaku dikena belajar sereta kaul dalam semua bansa Iban sereta ulih meri biuh ti manah ngagai jaku Iban.  Nyadi diatu, tu mih nyadika  pengelebih ngagai bansa Iban dalam chara berunding sereta besemekih dalam pengawa belajar.  Asil keranjai jari mega ulih diasilka sida ti ti ngembuan penemu ti dalam ba senentang ugama, cherita, karang, salasilah sereta kebukai. Tu tau bendar meri pemanah ngagai bansa kitai iya nya bansa Iban ngambika pandai nulis surat ngagai orang bukai.

Nangkanka nya, jaku Iban mega   udah sama tikas enggau jaku-jaku bukai ba dunya tu. Nya alai, iya dikumbai jaku penemu enggau komunikasyen nitihka ubah sereta pengerembai komuniti nya empu.  Kati ku enda pia,, laban tu mih chara neguhka jaku Iban ari segi jalai jaku, sistem sepil sereta kebukai. Kebuah pia, laban tu nitihka nangka ni jaku Iban tu sedia dikerembaika lalu diterima nyadi jaku penemu. Kitai sama bela nemu  ba Sarawak,  mayuh endur institusi ti kiruh ba senentang chara nguna jaku Iban. Enti kita berati jaku Iban suah dikena ba macham-macham pengawa kelebih agi, ba gereja tauk  Radio Malaysia Sarawak (RTM). Tu mih antara endur ke bisi bekenaka jaku Iban ti balat sampai ke diatu.  Bisi sekeda serakup baka Tun Jugah Foundation (TJF) bediri teguh ngemansangka sereta ngerembaika Litericha bansa Iban.  Kelimpah ari nya, Majlis Adat Istiadat Sarawak mega bejalaika langgur pengawa sida dalam mansik tutun menurun,main asal, adat sereta undang-undang dalam pengidup orang Iban.  Ukai semina nya aja, laban bisi serakup baka Sarawak dayak National Union (SDNU) enggau Sarawak dayak Iban Association (SADIA) bisi fungsyen sereta bekerejasama enggau institusi bukai ngaduka pengawa sida dalam ngerembaika jaku Iban ngagai tikas kelebih tinggi.

Jaku Iban tu cabang dalam perugan Austronesia nitika pansik sarjana lingusitik.  Ba penemu Asmah Haji Omar (2008), iya madahka jaku Iban tu endang serumpun enggau jaku Melayu tang bisi ngembuan penteba kediri empu nitihka terminology sereta peneguh pengarap, adat sereta undang-undang bansa Iban.  Taja pia, bisi mega penemu iya ti kebukai madahka jaku Iban udah ngerembai lebih kurang 1000 taun ti udah.   Tang mih bisi mega penemu nerangka jaku Iban endang bisi cabang ari dialek jaku Melayu enti baka nitihka pansik A.A Cence enggau M. Unlenbeck (1958). Enti enda dipansik enggau silik, ari segi etimologi jaku Iban endang enda ulih disakal kaul antara dua iti jaku tu tang jaku Iban tetap. Iya mega bisi identiti iya empu ti nyadi jaku bansa Iban.


Kelimpah ari nya, Padang Luna (2011) madahka jaku Iban bisi ngembuan benih iya empu sereta bediri ba atas kapasiti ti nyadi jaku ibunda bansa Iban. Iya tu ti berindik ba peninggi adat sereta daya idup ti lebih agi ari bansa-bansa bukai.  Baka chunto ti nyemetak bendar iya nya dalam litericha bansa Iban bisi tiga iti bagi funsyen jaku Iban dalam pengawa informasyen, pemerindang ati sereta adat asal.  Kementeriaan Pelajaran Malaysia (KPM) ngerembaika agi struktur tauka bagi guna jaku Iban sechara standard. Pusat Pengerembai Kurikulum nyadi jaku ke udah dipelajar di tikas sekula primari sereta sekundari.  Kitai patut temegah ati aban diatu jaku Iban mega dipasukka dalam peresa perintah baka Penilaian Menengah Rendah (PMR), Sijil Pelajaran Malaysia (SPM) enggau diatu dipelajar sampai ngagai tikas ti tinggi agi. Diatu jaku Iban nyau bisi ba peringkat Diploma (Institut Perguruan Malaysia) sereta ba peringkat Ijazah Universiti, kelebih agi ba Universiti Perguruan Sultan Idris (UPSI). 

Enti diambika banding, secara leksikostatistik jaku Iban enggau jaku Melayu bisi ngembuan kaul ti amat nyengala.  Jaku Iban enggau jaku Melayu bisi ngemuan 63% ti bisi kaul enti disbanding enggau jaku Jawa semina 35% aja enti nitihka pansik Asmah Haji Omar(2008).  Taja pia, Padang Luna (2011) ke diatu bedau agi bisi pansik ti digaga ti nerangka orang ti bejaku Melayu ba Pulau-pulau Melayu baka Indonesia, Malaysia sereta Filipina.  Ukai semina nya aja, iya mega nyengkaum tempat-tempat bukai ba Asia Tenggara nyetukka ngagai Indo-China, ke Pulau Madagaskar, Afrika enggau Pulau-pulau di Pasifik ti ulih bejaku Iban tauka nemu jaku Iban. Sida mega nemu jaku Iban  bisi ngembuan asal pengerembai jaku  sereta jaku Iban ti tulin lebih 5000 taun ti lalu.  Dalam bansa Iban iya nya bisi nunjukka jaku Iban nya empu bisi ngembuan penulin lebuh maya dikena dalam mayuh  macham pengidup bansa Iban.

Semantik

1.0  Tempalai kenang

Bidang ti dikumbai kita semantik iya nya bidang ti mansik  lalu nguse reti jaku enggau ayat. Nyadi leka jaku nya siti ari utai disebut lalu nyadika randau kitai lalu bisi ngembuan reti iya. nya alai, dalam jaku kitai ulih mantaika buah runding, emosyen, ulah,gaya runding enggau perangai siku-siku mensia. Semantik tu datai ari jaku Yunani “semantikos” ti mai reti beguna lalu ngembuan reti.  Nitihka penemuJ.W.M. Vehar (1996), iya   madahka semantik tu siti cabang linguistik ke ngemeranka reti.  Dalam Kamus Dewan bisi nerangka semantik mai reti mansik senentang reti leka jaku enggau penambah reti ba siti – siti leka jaku. Semantik tu mega mansik senentang lambang – lambang tauka kelai ti madahka reti, kaul entara reti enggau reti ke bukai nyadi tu dipeda sechara saintifik. Sechara rama, semantik tu iya siti ari bidang penemu senentang reti enggau reti ke berubah ba siti – siti leka jaku. Nitihka Ferdinand de Saussure, semantik nya siti jaku ke disebut dikena ngenataika reti. Choamsky madahka semantik nya reti ayat ke ditentuka struktur konteks  maya ayat dikena. sejarah” (M.Beral. 1893).

Dalam kereja kus tu, kami deka mansik sereta bejuraika tiga bengkah pekara. Pekara ti keterubah  iya nya, proses ngulihka jaku kedua sereta teori ti dikena ngulihka jaku kedua. Nyadi jaku kedua tu dipelajarka mensia lebuh maya ti sedar. Nya alai, chara ngulihka jaku kedua bebida ari chara ngulihka jaku keterubah. Siku-siku kitai mensia sigi endang bisi ngembuan pengelandik jaku ti diungkupka Petara. Pengelandik jaku tu beguna amat dikena  bekomunikasyen enggau pangan diri. Kitai mega sama bela nemu jaku kedua tu mega mayuh amat guna iya dalam sukut pelajar, politik enggau ekonomi.  Kelimpah ari nya, kami mega deka nyerenih siti artikel ti bekaul enggau gentilang reti sereta penanda wachana. Dalam tanya dua tu, kami deka mansik sereta bejuraika pekara ti bisi bekaul enggau artikel ke dipilih. Nya alai, kami patut nerangka gentilang reti enggau penanda wachana lalu meri chunto ti nemban bekaul enggau pekara dua iti nya

Ke simpul iya, semantik tu siti bagi ari bidang linguistik ke mansik jaku ngena jalai ke likun. Semantik mega ulih  nyadi siti bidang ke mansik reti leka jaku enggau ayat ba jaku. Pansik  ke ngembuan kaul enggau reti leka jaku ulih dipeda ba sukut reti, denotasyen enggau konotasyen, reti ba konteks, kaul reti enggau daya idup, tranformasyen reti enggau tukuh – tukuh reti ari kaul semantik.

2.0  Tanya 1

2.1 Proses ngulihka jaku kedua

Mayuh amat bida ti ulih dipeda lebuh maya kita ngulihka jaku keterubah enggau jaku kedua. Kebuah pia, laban jaku kedua tu diulih mensia lebuh maya ti sedar. Nya alai chara tu bebida ari chara ngulihka jaku keterubah.  Ba penemu Chaer enggau Agustina, chara ngulihka jaku kedua iya nya tikas ti bepun ari dulu nguasa jaku keterubah lalu ditambah mimit enggau penemu bekaul ba senentang jaku kedua.  Kholid A. Harras madahka jaku kedua iya nya jaku ti diulih nembiak pengudah sida landik ngulihka jaku keterubah. Ba penemu Henry Guntur Tarigan, chara ngulihka jaku kedua mai reti ngajar lalu belajarka jaku bansa bukai tauka jaku kedua kelimpah ari jaku diri empu. Penemu bala raban kognitif tu udah nyemetak bendar nerangka reti jaku kedua.

Lebuh ti deka ngulihka jaku kedua mayuh macham proses ti dipansa kitai. Antara proses ti bisi dipansa  aku iya nya ti keterubah aku ngulihka jaku ngena chara nembiak. Sebedau belajarka jaku kedua, aku dulu ngerembaika pengelandik aku dalam jaku keterubah iya nya jaku Iban. Proses ti kedua nya, aku ngulihka jaku kedua enggau chara belajar jaku ti deka dipelajar aku. Ambika chunto baka jaku Melayu enggau jaku ribai.Teori ngulihka jaku ke bisi dikena aku ngulihka jaku kedua ti bekaul enggau proses di atas iya nya Teori  Behaviorisme.  Reti teori Behaviorisme iya nya bansa teori ngulika jaku kelimpah ari teori mentalis, teori konstruktivisme enggau interaksionalisme. Teori tu ulih dikelai ari timbal ti diasilka mensia ngagai peransang.

Teori  Behaviorisme tu bekaul enggau pengerembai ulah mensia ti ulih dipeda lalu diasaika sida iya. Taja pia, teori tu mina diulih ari mensia ti ngaga pengawa latih ti dipelajarka berulang lalu nyadi peneleba ba siku-siku mensia. Nyadi pengawa tu suah digaga aku lebuh maya ngulihka Jaku kedua. Jaku ti diulihka mensia nengah chara S-R tu tadi deka diasilka tauka dikenataika ngena chara mekanis. S-R tu diulih mensia lebuh maya proses ngulihka jaku enggau chara ti enda formal. Teori Behaviorisme ngemeratka kaul entara peransang enggau timbal (S-R).

Nya alai dalam ngulihka jaku kedua tu, aku ngena teori behaviorisme. Kati ku enda pia, laban aku ngena latih ke berulang lalu nya nyau ngasuh aku bisi peneleba dalam ngulihka jaku kedua tu. Kelimpah ari nya, dalam ngulihka jaku kedua tu aku mega bulih iya lebuh maya sedarenda baka chara kitai lebuh maya bulih jaku keterubah. Dalam teori behaviorisme tu mega ngemeratka kaul entara peransang enggau timbal (S-R). Nyadi dalam proses ngulihka jaku kedua , aku bisi ngena kaul entara peransang enggau timbal (S-R) laban lebuh maya deka ngulihka jaku kedua kita mesti nimbal tauka nanya ngena jaku kedua nya. Tu mih kebuah kitai bekenaka peransang enggau timbal.

Teori kedua ti dikena aku ngulihka jaku kedua iya nya teori mentalis. Noam Chomsky(1959) madahka jaku semina dikena mensia lalu jalai jaku iya nya siti jaku diturunka.  Lebuh maya ngulihka jaku kedua ngena teori tu aku ngulihka jaku tu dipejalaika nengah chara asal.  Nitihka penemu iya mega chura pengerembai jaku sama enggau mayuh bengkah jaku enggau daya idup. Anak mit ti baru ada endang udah ngembuan jaku kediri empu (LAD) nyengkaum  meri bida ngagai munyi jaku enggau jaku bukai, nusun leka jaku lalu nyadi siti ayat  enggau penemu ti diterima tauka enda diterima ba sistem linguistik. Nya alai ,aku bisi ngena pteori tu laban aku endang udah bisi jaku kediri empu lebuh maya ada ke dunya tu. Ukai semina nya aja, aku mega bisi belajar nusun leka jaku lalu nyadi siti ayat ti engkeman dikena aku bekomunikasyen enggau orang bukai.

 Kelimpah ari nya, dalam bekenaka teori tu aku nadai ngira penemu ti dipelajar aku diterima tauka enda dalam sistem linguistik laban dikena ngemanahka tikas leka jaku ti dikena bejaku. Teori mentalis mega bisi rurun, tang rurun mentalis tu enda nerima chara belajar ba mensia ti nyadi ba jelu laban mensia ngembuan runding ti kompleks tang jelu ngembuan pengasai . Dalam proses ngulihka jaku kedua apai indai semina nemu jaku kedua ulih dipelajarka tang enda ulih dikuasa nengah proses tauka peneleba sida bekomunikasyen enggau orang bukai. Kitai sama bela nemu, enda semua orang ulih nguasa jaku kedua laban tiap iku mensia nya nitihka tikas pengelandik untak sida iya nguasa jaku kedua.

Simpul penemu, endang mayuh amat chara mensia ngulihka jaku kedua. Ambika chunto,  bisi nya ngena teori behaviorisme, teori konstruktivisme, teori Mentalis enggau teori Interaksionalisme. Nyadi semua teori tu bisi besangkut paut dalam ngulihka jaku. Tang enda semua kitai ngena  teori ti sama dalam ngulihka jaku ti dikena besehari-hari. Kati ku enda pia, laban kita ngena chara ti bebida dalam ngulihka jaku kedua.

3.0  Gentilang reti enggau wachana

3.1  Definisyen Gentilang reti

Ramli Salleh et al., (1997) madahka gentilang reti  nya siti raban ke mit aja ba sukut leksikal ti madahka reti iya agi bekaul laban penatai diri ba konteks ke sama. Nitihka Kamus Dewan mega, gentilang (medan) tu mai reti kandang ke mit, lalu reti (makna) nya reti.

3.2  Aspek dalam gentilang reti leka jaku

Reti dalam konteksdalam gentilang reti tu mayuh amat aspek ti dibungkur iya. nya alai, iya amat beguna dalam mansik senentang reti leka jaku. Pasnik senentang reti leka jaku tau dibagi ngagai beberapa aspek iya nya reti dalam konteks, kaul reti enggau daya idup, ubah reti enggau struktur reti ari kaul semantik.

(a)  Reti dalam kontejks

 Reti leka jaku disebut ulih ditemu labuh ti beratika konteks iya

Chunto	Reti dalam konteks
Kira bisi setengah batang ruku, dia Ugap lalu sedanah ngiga ai, madahka diri aus amat.	Reti aus dalam konteks tu iya nya rangkai rekung.

            (b) Kaul reti enggau daya idup

Chara tauka maya ke patut ngena sekeda leka jaku mega bisi bekaul enggau daya idup sesebengkah raban bansa.

Chunto	Reti
apai	dikena ngangauka lelaki ke enggau indai beranakka kitai
indai	dikena ngangauka orang ti ngadaka ke kitai
akih	dikena ngangau ke orang ti serambau enggau kitai ke ukai diri sekaban

(c) Ubah reti

            (i) Ngedut reti

Reti tu iya nya ubah peneleba enggau konteks, daya idup enggau penemu ulih ngedutka reti leka jaku ngambika spesifik agi.

Chunto	Reti
jalai (Genteran 6)	Reti lama : jalai darat Reti baru :jalai tar
langkau (Genteran 9)	Reti lama : langkau umai, langkau ampun Reti baru : langkau burung, langkau begiga, langkau perau, langkau kebun, etb.
rumah (Genteran 21)	Reti lama : rumah panjai Reti baru : rumah batu, rumah betingkat, rumah papan

(d)  Struktur reti ari kaul semantik

(i) Sinonim

 Leka jaku ti mai reti ti sama.

Chunto	sinonim
Nyau pengelama, nya baru apai enggau indai Melaka datai ari umai lalu meda mayuh  amat orang  ba ruai sida Empauk. Meda baka  nya, dia seduai iya lalu berumban ngelawa orang mayuh ke benung begelumu nya.	betugung enggau begelumu ngembuan reti ti sama

(ii) Polisem

Reti tu iya nya siti leka jaku bisi ngembuan lebih tauka siti reti.

Chunto	Reti
Pangan (Genteran 1)	1.    Bakih, kaling, sulu,orang ke enggau beteleba 2.    Suku juru, kaban belayan 3.     (orang) champur, gulai gawa, orang teleba
beras (Genteran 4)	1.    Padi ti udah tekupas kulit kena tutuk tauka injin, ke dipanduk nyadi asi : beras / beras 2.    Burung beras, sebagi burung ti mit ari empulu,bependiau sebelah-belah tebing sungai di menua ili.
jalai (Genteran 6)	1.    Arung ti digaga ke tengah orang (kerita, etb.) 2.    2. Chara tauka akal dikena ngereja siti-siti pengawa, strategi. 3.    Ngereja pengawa 4.    Mindah nguna kaki 5.    Ulih idup , menyadi, gerak 6.    (pasal penemu, etb.)ulih dikena(diterima, diguna) 7.    Perangai , peniri, ulah peneleba
langkau (Genteran 9)	1.    Rumah mit ti nyembuah, bansal, dangau, etb 2.    Arak panduk diri em[u ke ngena chara belalai (ukai dipanduk ba kilang arak )
tawas (Genteran 19)	1.    Enda petang, siang hari, terang 2.    Batu tawas, kemikal dikena ngasuh ai chiru sereta dikenamunuh igi penyakit dalam ai nya
batang (Genteran 19)	1.    bagi utai tumbuh (baka kayu, tebu,buluh, rutan/ wi 2.    jaku pengenap tesa ke tiang (senapang, insap segerit, ruku,pen, ngeli, etb. )
rantau (Genteran 20)	1.    Apak batang sungai ti lurus sereta panjai 2.    Sebagi pukat dikena berikan di sungai ti datai pasang enggau di tasik
tugung (Genteran 21)	1.    Dunjung, pangkat,kapar, di empuru ka mayuh ba siti alai 2.    Batu digempuru sereta dipangkatka di kaki tauka pala lubuk ba ai ke enda berapa dalam 3.    Chara nyanggit atap tebelian
Tajau (Genteran 27)	1.    perengka ti tinggi bebenung segala, kuchup ke baruh lalu nyeregang mimit ba mua sereta bebibir enggau berambing 2.    jaku pengabis siru enggau gaga dikena ngangauka anak uchu 3.    akar tajau, sebagai akar ngelekar tumbuh diri dalam babas bebuah dalam tanah baka ubi, etb.

3.3  Definisyen penanda wachana

Kamus Dewan, madahka wachana iya nya gerempung jaku turai tauka runding ti disebut sereta dikenataika ngena chara betulis. Wachana tu mega tinggi agi ari klausa enggau ayat. Ukai semina nya aja, wachana tu nyengkaum ayat, randau, topik,bup enggau ti kebukai sereta ti ngembuan kaul enggau kerembai runding.

3.4   Penanda wachana

(1)  Penanda wachana dikena ngepunka ayat pemuka karang bertulis

Chunto	Penanda wachana dikena ngepunka ayat pemuka karang bertulis
Dulu kelia, ba sebuah rumah panjai kitai Iban, bisi dih empat iku nembiak diri sebakih.(Genteran 1)	Dulu kelia
Tumu pagi nya Empauk enggau Baul lalu nurun ke pendai.	Tumu pagi

(2)  Penanda wachana dikena nyebut stilistik

(I)            Ngulang leka jaku

Leka jaku ti sama deka diulang dalam siti ayat tauka dikena mandangka kaul entara leka jaku enggau ayat.

Chunto	Leka jaku ti diulang
Ngetan bubu tauka ngasu , sida empat tu nadai kala ninggalka pangan diri, nadai limpang ari pangan.( Genteran 1)	pangan
Enti mindah sama mindah, enti di rumah pan sama mega diau ba rumah. ( Genteran 1)	mindah
Kenu ku jerita, bisi sekali sida empat tu baum deka ngereja pengawa ngatika diri laban ngasaika diri suah ngereja pengawa begulai enggau orang ke tuai. ( Genteran 1)	ngereja pengawa
Penemu udah selubang, sida lalu pulai ke bilik diri empu, ngasuh indai sida iya besikapka barang ke bekal dikena ngereja nyelutung baka beras, sulung pat enggau kelita biung. (Genteran 4)	sida
Tumu pagi, dia Baul enggau Ugap dani angkat berapi laban deka ngaga jalai nyelutung. Hari tawas, dia sida empat pan sama nebas jalai nyelutung. (Genteran 6)	jalai nyelutung
Baka nya mih pengawa sida empat sebuat sekumbang ti ngerandang jalai ngereja nyelutung nyentuk ke hari siti ba jalai nyelutung ketujuh, dia Melaka lalu tetemuka telu manuk sigi. (Genteran 6)	nyelutung
Maya tetemuka telu manuk nya, dia Baul, Empauk enggau Ugap bela ngasuh Melaka muai telu manuk nya tang iya enggai laban deka mai telu manuk nya pulai ke langkau. (Genteran 6)	telu manuk
Ninga munyi nya, sida iya pan lalu besikap magang mulaika diri ngagai pun jalai lalu terus ke langkau. (Genteran 9)	lalu
Melaka sigi enda ngandalka orang bukai kiruh enggau telu manuk nya laban iya meda sida bukai nya mantah ari pun tadi. (Genteran 9)	bukai
Baul, Ugap enggau Empauk makai belauk ikan keli, semina Melaka aja makai belauk telu manuk taja pan udah ditagang ari tadi. (Genteran 9)	makai belauk
Engka ensepi enda ulih ditatka agi, dia Ugap pan lalu nyuap laluh telu ke diempa Melaka tadi. Empauk enggau Baul sama ngenung meda ulah seduai menyadi ke bela makai telu manuk nya tadi. (Genteran 10)	telu
Nyau ambis mih ai dalam genuk ditembuka seduai menyadi nya. Meda baka nya, dia Empauk lalu ngasuh Baul nyauk ai baru. (Genteran 12)	ai
Empauk mutap dalam ati laban Melaka bangat enda mendingka jaku iya lalu pekara nyelai ke nyadi nya tentu mega bisi besangkut paut enggau telu ti diempa seduai iya maya makai tadi. (Genteran 14)	iya
Kira nyau semak tengah malam, Melaka enggau Ugap empai ga pulai ari pendai. Meda baka nya, dia Empauk enggau menyadi iya pan lalu nitihka seduai iya ke pendai. (Genteran 14)	pendai
Baul enggau Empauk lalu ngelawa ngagai tunga nyawa Melaka ke nyaut seduai iya ngangau tadi . Datai din seduai iya tekenyit amat ati laban Melaka enggau menyadi iya Ugap udah bebali nyadi naga. (Genteran 17)	seduai iya
Pemuas ke beberap nyabak, dia Melaka pan ngasuh Empauk enggau menyadi iya pulai ke langkau nganti ari tawas. Ugap enggau Melaka endang nadai jalai ulih pulai ke langkau kin agi laban enda ulih jauh ari ai. (Genteran 19)	langkau
Datai din seduai iya meda Melaka enggau menyadi Ugap udah ngunjur ulu sungai, nyau mesai batang tapang.  Kenu ku Melaka enggau Ugap , makin mayuh ai diirup seduai iya, tubuh seduai iya makin besai-sebesai. (Genteran 20)	seduai iya
Hari siti kira tengah ngalih, seduai iya pan nuntung ba rumah panjai sida iya. (Genteran 21)	iya
Datai di rumah, seduai iya lalu nusui ke bala mayuh pasal penusah ti nuntung Melaka enggau menyadi iya Ugap tang maya nya apai enggau indai Melaka nadai di rumah laban ke udah nurun ke umai. (Genteran 21)	iya
Nama dih, nyau rauh-rauh apai enggau indai Melaka merap anak seduai iya. Seraya nya mega sida iya begau ngidupka apai enggau indai Melaka ke luput meda anak seduai nyau ukai mensia agi. (Genteran 24)	apai enggau indai
Pemulai sida iya serumah ari endur Melaka enggau menyadi iya Ugap ke bebali nyadi naga, dia sida serumah lalu ngerapuh seduai menyadi nya laban sigi ditemu enda pulai nyadi mensia agi. (Genteran 26)	serumah
Pengawa ke dikumbai ‘ngerapuh’ tu iya nya sebengkah adat tauka chara ngintu orang parai endai temu tauka parai di menua orang ti alai bangkai iya enda ulih pulai ke menua. (Genteran 27)	parai
Tembu ngerapuh seduai menyadi nya, rumah panjai sida pan pulai baka selama tang Empauk enggau Baul sigi enda richah laban ati seduai semampai tusah, ingat ke bakih seduai iya ti udah enda neggau begulai agi. (Genteran 27)	seduai
Kira dua minggu sepengudah nya, dia mua hari lalu bebali chelum. Hari pan lalu kudi biau balai., pun kayu ambis tumbang. (Genteran 28)	hari
Nemu mih sida iya diatu, seduai menyadi nya enda agi nguan ulu sungai ti alai seduai iya ditemu sida iya serumah suba. Apai enggau indai Melaka seduai Ugap semina nyabak rauh-rauh aja laban ke nadai nemu daya agi. (Genteran 28)	seduai

(II)          Penanda wachana dikena meri chunto

Chunto
Penemu udah selubang, sida lalu pulai ke bilik diri empu, ngasuh indai sida iya besikapka barang ke bekal dikena ngereja nyelutung baka beras, sulung pat enggau kelita biung.	baka