MANAH UKIR TERABAI

AKU ANAK IBAN

Penatai Bansa Iban ti Nguan Menua Sarawak

2.0 Pansik enggau dokumen

Kitai Iban tu enda tentu nyengala temu penatai asal kitai.  Kebuah pia, laban ti kelalu mayuh menua alai penatai kitai Iban ti dijangka sebedau ke nguan menua Sarawak. Enti nitihka pansik enggau dokumen tu enti peratika asal penatai semua bansa mensia endang iya datai ari Adam seduai Awa kelia.  Seduai tu di Timur  Tengah ka beranak betelesak lalu mensia bepecah lalu mepar di serata dunya tu. Enti nitihka siti-siti pengarap, bisi madahka  petara nurunka mensia bebida bansa, cura kulit enggau jaku ngambika kitai bekelala enggau diri sama diri.  Enti nitihka penemu antropologi semua orang rindu deka nemu asal penatai bansa enggau peturun diri empu.  Nyadi ba kitai bansa Iban endang  penemu betusut.  Nadai udah ditemu bisi bup tauka dokumen ti nyemetak nerangka asal penatai bansa Iban naka ke diatu.  Ukai semina nya aja pansik ke silik lalu nyengala pasal bansa Iban pan nadai udah kala dipejalaika.

2.1 Menua Batang Kapuas, Kalimantan Barat, Indonesia

Batang Kapuas tu siti ari sungai ti endang pemadu panjai ba Indonesia iya nya 1143 km sereta sungai ti pemadu panjai di pulau Borneo. Sungai tu jauh panjai ari sungai batang Rajang ke pemadu panjai ba Malaysia ke semina 563 Km.  Nyadi tuai bansa Iban dikingatka datai ari menua  Batang Kapuas di Kalimantan, Indonesia.

2.3 Menua Yunnan, China

Bisi sekeda pansik madahka bansa Iban datai ari menua Yunnan di menua China.  Pansik tu nitihka pansik orang ke landik pasal mensia.  Ari Yunnan, etnik tauka bansa ari Yunnan  deka nurunka bansa Iban pindah ke menua Indochina.  Menua Indochina tu Laos, Vietnam, Kambodia enggau Thailand. Bansa Iban pindah ke Semenanjung ari menua Indochina. Taja pia, dalam sejarah China lama tauka baru nadai kala nyebut pasal  bansa Iban bisi di China laban pemindah tu nyadi jeman dulu kelia,.  Dulu kelia, laban Iban tu ko aki ini kitai kelia dikena nyebut orang tauka mensia lalu nama bansa Iban dih apin bisi lalu jaku pan apin meruan baka ka diatu

2. 4 Gunung Mensuat, Mekah, Timur Tengah.

Nyadi siti agi pansik bisi madahka bansa Iban tu datai ari Gunung Mensuat, semak Mekah di Saudi Arabia. Bansa Iban ari Gunung Mensuat lalu pindah ke Sumatra. Sepengudah nya, bansa Iban lalu pindah ngagai Pulau Borneo lebuh maya sida udah mansutka diri ari Sumatra. Lebuh Iban pindah ke Borneo tu mih ke nepat Batang Kapuas sebedau sida melunggang ke Sarawak kitu.

2.5 Ukai ari Batang Kapuas

Nangkanka nya, bisi mega seraban bansa Iban ke ukai datai ari Batang Kapuas. Kebuah pia, laban raban sida tu dibatak Sebatin ke bemain ai pasang enggau anak iya Derom. Derom tu  ti  datai ari segum gigi gumbang. Kelimpah ari nya, iya mega bisi anak lelaki siku agike benama Senaun. Kebendar iya Sebatin tu datai ari Timur Tengah. Ketegal ti tepawah dipangka ke gelumbangiya lalu terengkah di Tanjung Datu ba ujung Pulau Borneo. Sera Bungkuk Ketuk Tunjuk Penebuk Tiang Tembang ti  diperanakka anak iya Derom tu nurunka Iban Ulu Batang Ai, Beketan enggau Iban Saribas. Senaun tu anak Sebatin ti nurunka Tugau, iya nya siku tuai bansa Rajang tauka bansa Tanjong ke chukup beberita dulu kelia. Tugau tu kering sereta berani. Kenu ko cherita, empa pengering Tugau, ai kemi iya aja tepesukka daun birah (keladi).